الخيانه عباس الفياض

[عباس الفياض]

بسمار الغدر دكيته ليه اشلون
عفت كل جسمي ليش ابكلبي دكيته
جررحك انت جان ابكبر هذا الكون
بس الكون هذا ابكلبي خليته
اشما تصبغ ابكلبك يبقى نفس الليل
وعلى سكف السمى ايصرز نجوميته
شلت بيك حبل وانكلي هذا الشوك
ومن كد ماتحبني ابحري لفيته
حسبالك طحت ميت صرت جناز
وكلبك جي خشب تابوت سويته
ناعور الغدر يفتح اجروح الماي
شك صدر النهر يغرف عذوبيته
فصلت الوفى الشفتك لجن مصار
جلمات الاذيه امفصله الشفتك
قصت حب ردت بيه البطل غدار
اذن حقه الجلاد ايشكك ابقصنك
شمعك لاتلبسه وانت كلك نار
وعلى صيت المضاهر عودت شمعك
كتلك موسهل واحد يبيع ادموع
مودمعك ذهب جا رخصت دمعك
مراجيحك وهم تركب سراب العيد
اهلالك يوسف انت وجيب الليطلعك
من طبعي نخل واكف اموت ابزود
ميت ماتشوفه ابوكفته ايقنعك
وابد فوك الجفن لاتزرع الصفنات
خافنك تنوح اطيح صفنــــــــــــاتك
كتلك لاتمد جفك نريد الشوف
ولنت اجكد رخيص اتبيعد نظـــراتك
واكتب لافته بيه العشك مذبوح
وعلى حايط اخدودك دكلي دمعاتك
علي جانت ضحكتك تركض ابلاثوب
وتزرع مو ورد تزرعلي حسراتك
تذبح لون عينك جانت الدمعات
وي نكلت خطوتي اتهيج دكاتــــك
مكسور الجنح باجر ترد اردود
وجنحك حيل يصرخ ويه وكعاتك
لانرجع بعد باب العذر مسدود
لتظن ينفتح بجفوف دمـــعاتك
وافرض لوفتحته الكلب ماموجود
خذاه انسان ثاني ايروف طعناتك




مع تحياتي عباس الفياض
أتمنى ان تنال اعجابكم قصيدتي